ନିର୍ବାଚନ ରାଜନୀତି ହିନ୍ଦୁତ୍ୱରେ ପରିଣତ
ପାଞ୍ଚଟି ରାଜ୍ୟରେ ନିର୍ବାଚନ ପ୍ରଚାର ଏବେ ସରଗରମ ହେବାରେ ଲାଗିଛି । ପ୍ରଚାରରୁ ସ୍ପଷ୍ଟ ହେଉଛି ଯେ ଏବେ ଭାରତୀୟ ରାଜନୀତିରେ ଧ୍ରୁବୀକରଣ ହେଉଥିବା ହିନ୍ଦୁ ମତଦାତାମାନଙ୍କୁ ନିଜ ଆଡ଼କୁ ଟାଣି କ୍ଷମତା ହାସଲ ପାଇଁ ବିଭିନ୍ନ ରାଜନୈତିକ ଦଳ ପ୍ରୟାସ ଚଳାଇଛନ୍ତି । ହିନ୍ଦୁ ଧର୍ମର ଦେବତାଙ୍କୁ ପୂଜା କରି ମନ୍ତ୍ରପାଠ କରିବାକୁ ଅଧିକାଂଶ ଦଳ ଓ ନେତାଙ୍କ ମଧ୍ୟରେ ପ୍ରତିଯୋଗୀତା ତୀବ୍ର ହେବାରେ ଲାଗିଛି । ଭାରତୀୟ ରାଜନୀତିରେ ଏହି ଧାର୍ମିକ ପରିବର୍ତ୍ତନକୁ ଅସାଧାରଣ କୁହାଯାଇପାରେ । ହିନ୍ଦୁତ୍ୱ ବିଚାରଧାରା ଉପରେ ଗୁରୁତ୍ୱ ଦେଉଥିବା ବିଜେପି ଏବଂ କିଛି ଛୋଟ ଦଳକୁ ଛାଡ଼ିଦେଲେ ବର୍ତ୍ତମାନ ପର୍ୟ୍ୟନ୍ତ ଅନ୍ୟ କୌଣସି ରାଜନୈତିକ ଦଳ ବା ରାଜନେତା ନିଜକୁ ଜଣେ ବିଶ୍ୱସ୍ତ ଏବଂ ଧାର୍ମିକ ହିନ୍ଦୁ ବୋଲି ନିଜକୁ ପ୍ରମାଣ କରିବାକୁ ଚେଷ୍ଟା କରି ନ ଥିଲେ । ବରଂ ଏହି ହିନ୍ଦୁତ୍ୱ ଚିନ୍ତାଧାରା ଯୋଗୁ ବିଜେପିକୁ ସାମ୍ପ୍ରଦାୟିକ ତଥା ମୁସଲମାନ ବିରୋଧୀ ବୋଲି ଧର୍ମନିରପେକ୍ଷ ବୋଲାଉଥିବା କିଛି ରାଜନୈତିକ ଦଳମାନେ ଆକ୍ଷେପ କରୁଥିଲେ । ଯେଉଁମାନେ ନବେ ଦଶକର ଭାରତୀୟ ରାଜନୀତି ଦେଖିଛନ୍ତି ସେମାନଙ୍କ ପାଇଁ ଏହି ପରିବର୍ତ୍ତନ ସ୍ୱାଭାବିକ ବୋଲି କୁହାଯାଇ ପାରିବ ନାହିଁ । ସେତେବେଳେ ବିଜେପିକୁ ମୁସ୍ଲମାନ ବିରୋଧୀ ବୋଲି ମମତା ବାନାର୍ଜୀ ଅଭିହିତ କରି ଏନଡିଏ ସରକାରରୁ ଅଲଗା ହୋଇଯାଇଥିଲେ । ଏହାପରଠାରୁ ସେ ମୁସ୍ଲିମ ଭୋଟ ବ୍ୟାଙ୍କ ହିନ୍ଦୁ ମତଦାତାମାନଙ୍କୁ ହେୟଜ୍ଞାନ କରିଚାଲିଥିଲେ । ଚଳିତ ନିର୍ବାଚନରେ କିନ୍ତୁ ମୁସ୍ଲିମ ତୁଷ୍ଟୀକରଣ କାମ ଦେଉନାହିଁ । ‘ମୁଁ ଜଣେ ବ୍ରାହ୍ମଣ ଏବଂ ମୋତେ କୌଣସି ହିନ୍ଦୁ ଧର୍ମ ଶିକ୍ଷା ଦିଏ ନାହିଁ’ ବୋଲି କହିବାକୁ ମମତା ବାନାର୍ଜୀ କିପରି ବାଧ୍ୟ ହେଉଛନ୍ତି ତାହା କେହି କଳ୍ପନା କରିପାରି ନ ଥିଲେ ।
ନନ୍ଦିଗ୍ରାମରେ ନାମାଙ୍କନପତ୍ର ଦାଖଲ କରିବା ପୂର୍ବରୁ ଦୁର୍ଗା ସପ୍ତସତୀଙ୍କ ଶ୍ଲୋକ ପଢ଼ିବା ମମତାଙ୍କ ରାଜନୈତିକ ପୃଷ୍ଠଭୂମି ସହିତ ଆଦୌ ମେଳ ଖାଉନାହିଁ । ଯଦି ଇମାମ୍ ଏବଂ ଅଜାନ୍ ଦେଉଥିବା ମୁସ୍ଲିମ ଧର୍ମଗୁରୁଙ୍କ ପାଇଁ ମାସିକ ଏକଲକ୍ଷ ଟଙ୍କା ଘୋଷଣା କରୁଥିବା ମମତା ଦୁର୍ଗା ମଣ୍ଡପ ପାଇଁ ସରକାରୀ ପାଣ୍ଠିରୁ ଅର୍ଥ ଘୋଷଣା କରଛନ୍ତି । ଆରଏସଏସ ଏବଂ ବିଜେପି ଦୀର୍ଘ ଦିନ ଧରି ଯେଉଁ ହିନ୍ଦୁତ୍ୱ ବାତାବରଣ ସୃଷ୍ଟି କରିବାକୁ ଯେଉଁ ଚେଷ୍ଟା କରୁଥିଲେ ସେଥିରେ ସଫଳତା ମିଳିବାରେ ଲାଗିଛି । ଯଦି ମମତାଙ୍କର ଏଭଳି ପଦକ୍ଷେପ ନିର୍ବାଚନ ପୂର୍ବରୁ ହୋଇଥାନ୍ତା ତେବେ ଧର୍ମନିରପେକ୍ଷ ବୋଲାଉଥିବା କଂଗ୍ରେସ, ବାମପନ୍ଥୀ ଓ ଅନ୍ୟାନ୍ୟ ରାଜନୈତିକ ଦଳମାନେ ମମତାଙ୍କୁ କଡ଼ା ସମାଲୋଚନା କରିଥାନ୍ତେ । କିନ୍ତୁ ଏବେ କମ୍ୟୁନିଷ୍ଟ ଦଳ ଓ କଂଗ୍ରେସର ସ୍ୱର ସେତେ ଶକ୍ତିଶାଳୀ ନୁହେଁ । ବାସ୍ତବରେ, ନରେନ୍ଦ୍ର ମୋଦୀଙ୍କ ନେତୃତ୍ୱରେ ବିଜେପି ସମ୍ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରି ରାଜନୀତିରେ ପ୍ରବେଶ କରିବା ପରେ ଏଭଳି ଧାର୍ମିକ ପରିବର୍ତ୍ତନ ଆସିଛି ।
୨୦୧୭ରେ ଉତ୍ତରପ୍ରଦେଶ ବିଧାନସଭା ନିର୍ବାଚନ ପରେ ତଥାକଥିତ ଧର୍ମନିରପେକ୍ଷତାର ବଳୟ ଭାଙ୍ଗିଯାଇଛି । ନିର୍ବାଚନ ସମୟରେ ରାହୁଲ ଗାନ୍ଧୀ ମନ୍ଦିରରୁ ମନ୍ଦିରକୁ ଯିବା, ଭଜନ ମଣ୍ଡଳି ସହିତ ଭଜନ ଗାଇବା, ସେ ଜଣେ ପଇତାଧାରୀ ବ୍ରାହ୍ମଣ ଏବଂ ଜଣେ ଶିବ ଭକ୍ତ ବୋଲି ବାରମ୍ବାର କହିବାରେ ଲାଗିଥିଲେ । ଏହା ପ୍ରମାଣ କରୁଛି ଯେ, ଧର୍ମନିରପେକ୍ଷଦଳ ତଥା ନେତାଙ୍କ ଉପରେ ହିନ୍ଦୁତ୍ୱର ଚାପ ସୃଷ୍ଟି ହୋଇଛି । ଯେଉଁଠାରେ ବିଜେପିର ଆଧାର ଅଛି ସେହି ମତଦାତାମାନେ ଧର୍ମନିରପେକ୍ଷତା ରାଜନୀତି ହେତୁ କଂଗ୍ରେସ ସମେତ ବାମପନ୍ଥୀ, ଓ ଅନ୍ୟାନ୍ୟ ଦଳମାନଙ୍କୁ ମୁସଲମାନ ସମର୍ଥକ ଭାବରେ ଗ୍ରହଣ କରିଛନ୍ତି ଏବଂ ଭୋଟ୍ ଦେଉ ନାହାଁନ୍ତି ।
ଏଥିରୁ ରକ୍ଷା ପାଇବା ପାଇଁ ଏକଦା ମୁସ୍ଲମାନମାନଙ୍କର ସଂରକ୍ଷକ ବୋଲାଉଥିବା ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ ଅଯୋଧ୍ୟାରେ ଉଦ୍ଧାର ଏବଂ ଅଙ୍ଗକୋରୱାଟ ଭଳି ଏକ ଭବ୍ୟ ବିଷ୍ଣୁ ମନ୍ଦିର ନିର୍ମାଣ ଘୋଷଣା କରିଛନ୍ତି । ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡ଼ ନିର୍ବାଚନରେ କଂଗ୍ରେସ ନିର୍ବାଚନୀ ପ୍ରତିଶ୍ରୁତିରେ ହିନ୍ଦୁ ମତଦାତାମାନଙ୍କୁ ଗୁରୁତ୍ୱ ଦିଆଯାଇଥିଲା । ବିହାରରେ ଆରଜେଡିର ତେଜସ୍ୱୀ ଯାଦବ ରାମ ମନ୍ଦିର ନାମରେ ରାଜନୀତି କରୁଥିବା ବିଜେପିକୁ ପ୍ରତାରଣାର ଦଳ ବୋଲି କହିଛନ୍ତି । ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାଠାରୁ ଦକ୍ଷିଣରେ କର୍ଣ୍ଣାଟକ ଏବଂ କେରଳ ପର୍ୟ୍ୟନ୍ତ ବହୁ ଅଣ-ବିଜେପି ଦଳର ନେତାମାନେ ସର୍ବସାଧାରଣରେ ପ୍ରକାଶ କରୁଥିବା ଶବ୍ଦ ଓ ଚିନ୍ତାଧାରାରେ ହିନ୍ଦୁତ୍ୱର ପ୍ରତିଧ୍ୱନୀ ଏବଂ ଦୃଷ୍ଟିଭଙ୍ଗୀ ସ୍ପଷ୍ଟ ଭାବରେ ଦେଖାଯିବାରେ ଲାଗିଛି ।
ସମସ୍ତ ରାଜନୈତିକଦଳ ମୁସଲିମ ଭୋଟ୍ ବ୍ୟାଙ୍କକୁ ନେଇ ଚିନ୍ତିତ ବୋଲି ଆରଏସ୍ଏସ୍ ଦୀର୍ଘ ଦିନ ଧରି କହିଆସୁଛି । କାରଣ ଏହି ସମ୍ପ୍ରଦାୟ ମିଳିତ ହୋଇ ଗୋଟିଏ ଦଳକୁ ସମର୍ଥନ କରିଥାଏ । ଯଦି ହିନ୍ଦୁମାନେ ସଂଗଠିତ ହେବା ଆରମ୍ଭ କରନ୍ତି ତେବେ ସମସ୍ତ ଦଳ ହିନ୍ଦୁ-ହିନ୍ଦୁ ଆରମ୍ଭ କରିବେ । ରାମ ମନ୍ଦିର ଆନ୍ଦୋଳନ ଏହି ଲକ୍ଷ୍ୟ ହାସଲ କରିବାକୁ ଆରଏସ୍ଏସ୍ ଏବଂ ବିଜେପି ଚିନ୍ତା କରିଥିଲା, କିନ୍ତୁ ୬ ଡିସେମ୍ବର ୧୯୯୨ରେ ବାବ୍ରୀ ମସ୍ଜିଦ ଘଟଣା ପରେ ଏହି ଅଭିଯାନକୁ ଗୁରୁତ୍ୱ ଦେଇ ନ ଥିଲା । ବିଜେପି ନେତାମାନେ ଜୟ ଶ୍ରୀ ରାମ ସ୍ଲୋଗାନକୁ ମଞ୍ଚରୁ କହିବା ବନ୍ଦ କରିଦେଇଥିଲେ । ଧର୍ମନିରପେକ୍ଷ ରାଜନୀତିର ଚାପ ବିଜେପିର ଶୀର୍ଷ ନେତୃତ୍ୱମାନଙ୍କ ମଧ୍ୟରେ ସ୍ପଷ୍ଟ ଦେଖାଯାଉଥିଲା । ଆଡଭାନୀ ଏବଂ ବାଜପେୟୀଙ୍କ ନେତୃତ୍ୱରେ ବିଜେପି ନିଜକୁ ଏକ ମଧ୍ୟମପନ୍ଥୀ ଦଳ ଗଠନ କରିବାର ଅଘୋଷିତ ପ୍ରକ୍ରିୟା ଆରମ୍ଭ କରିଥିଲା । ସଂଯୋଗକ୍ରମେ, ତାଙ୍କ ନେତୃତ୍ୱରେ ବିଜେପିର ସରକାର ମଧ୍ୟ ଗଠନ କରାଯାଇଥିଲା।
ବିଜେପିର ଏହି ରାଜନୀତିକୁ ନେଇ ସମଗ୍ର ଆରଏସ୍ଏସ୍ ସଂଗଠନ ମଧ୍ୟରେ ଅସନ୍ତୋଷ ବଢ଼ିବାକୁ ଲାଗିଲା । ଏପରିକି ଆରଏସ୍ଏସ୍ ସଂଗଠନ ସହିତ ଜଡ଼ିତ ବାଜପେୟୀ ସରକାରଙ୍କୁ ବିରୋଧ ସଂଘ ପକ୍ଷରୁ ବିରୋଧ ଆରମ୍ଭ କରିଥିଲା । ଫଳସ୍ୱରୂପ, ତାଙ୍କର ସମର୍ଥନ ହ୍ରାସ ପାଇବାରେ ଲାଗିଲା । ଆରଏସ୍ଏସ୍ ପକ୍ଷରୁ ବିଜେପିକୁ ହିନ୍ଦୁତ୍ୱ ଆଦର୍ଶରେ ଆଣିବାକୁ ଚେଷ୍ଟା କରିଗଲା । ନରେନ୍ଦ୍ର ମୋଦୀ ଜାତୀୟ ସ୍ତରରେ କ୍ଷମତାସୀନ ହେବା ପର୍ୟ୍ୟନ୍ତ ଆରଏସ୍ଏସ୍ ସଫଳତା ପାଇପାରି ନ ଥିଲା । ଗୁଜୁରାଟର ମୁଖ୍ୟମନ୍ତ୍ରୀ ଥିବାବେଳେ ମୋଦୀ ହିନ୍ଦୁତ୍ୱର ସବୁଠାରୁ ବଡ଼ ଚେହେରା ହେବା ପରେ ବିଜେପିରୁ ବିଚ୍ଛିନ୍ନ ହୋଇଥିବା ସଂଗଠନ, ନେତା ତଥା ସାଧାରଣ ଲୋକ ପୁନର୍ବାର ତାଙ୍କୁ ସମର୍ଥନ କରିବାକୁ ଲାଗିଲେ।
ଏହିପରି ଭାବରେ ରାଜନୀତିରେ ହିନ୍ଦୁ ଧର୍ମ ଗୁରୁତ୍ୱ ପାଇବାର ପ୍ରକ୍ରିୟା ଆରମ୍ଭ ହୋଇଛି । ଅବଶ୍ୟ, ଏହାର ଅର୍ଥ ନୁହେଁ ଯେ ଅବଶିଷ୍ଟ ଦଳମାନେ ହିନ୍ଦୁତ୍ୱର ଦାର୍ଶନିକ ଦର୍ଶନକୁ ହୃଦୟ ସହିତ ଗ୍ରହଣ କରିଛନ୍ତି । ହିନ୍ଦୁତ୍ୱଦ୍ୱାରା ଅନୁପ୍ରାଣିତ ହୋଇ ବିଜେପିର ସଂଗଠନ ଶକ୍ତିପ୍ରାପ୍ତ ହୋଇଛି । ଯେତେବେଳେ ସେମାନେ ହିନ୍ଦୁତ୍ୱ ବିଷୟରେ କଥାବାର୍ତ୍ତା କରନ୍ତି ବିଜେପି ନେତାଙ୍କ ମଧ୍ୟରେ ଏକ ସ୍ୱାଭାବିକତା ଏବଂ ସ୍ୱତଃ ପ୍ରବୃତ୍ତତା ଥାଏ । ଏହା ସହିତ ସମାନ୍ତରାଳ ଭାବେ, ଅନ୍ୟ ଦଳମାନେ କେବଳ ଭୋଟ୍ ପାଇଁ ନିଜକୁ ହିନ୍ଦୁଙ୍କ ହିତାକଂକ୍ଷୀ ବୋଲି ପ୍ରମାଣ କରିବାକୁ ଚେଷ୍ଟା କରୁଛନ୍ତି । ସେଥିପାଇଁ ସେମାନଙ୍କର କଥାବର୍ତ୍ତା ଏବଂ ବ୍ୟବହାରେ ଛଳନା ପରିଲକ୍ଷିତ ହୋଇଥାଏ ।
ହିନ୍ଦୁତ୍ୱ ଏକ ବ୍ୟାପକ ଏବଂ ସର୍ବମାନ୍ୟ ଚିନ୍ତାଧାରା । କେବଳ ବ୍ୟକ୍ତି ନୁହେଁ ବ୍ରହ୍ମାଣ୍ଡର ସମସ୍ତ ଜୀବଙ୍କର କଲ୍ୟାଣ ଭାବନା ଏଥିରେ ରହିଛି । ଏହା ହେଉଛି ଭାରତର ମୌଳିକ ଆଭ୍ୟନ୍ତରୀଣ ଶକ୍ତି, ଯାହା ଉପରେ ଆମର ମହାନ ବ୍ୟକ୍ତିମାନେ ବିଶ୍ୱର ମାର୍ଗଦର୍ଶନ କରିବାକୁ କଳ୍ପନା କରିଥିଲେ । ରାଜନୀତିରେ ଏହାକୁ ସଠିକ୍ ଢଙ୍ଗରେ ନ ବୁଝିବା କାରଣରୁ ହିନ୍ଦୁତ୍ୱ ଅନ୍ୟ ଧର୍ମର ବିରୋଧି ତଥା ସାମ୍ପ୍ରଦାୟିକ ଭାବନାରେ ପରିଣତ ହେଲା । ରାଜନୀତି ଏହି ବିକୃତ ଚିନ୍ତାଧାରାରୁ ବାହାରି, ହିନ୍ଦୁତ୍ୱକୁ ଏହାର ପ୍ରକୃତ ଉଦାରବାଦୀ ଏବଂ ନମନୀୟ ରୂପରେ ଗ୍ରହଣ କରିଥିଲେ ଭଲ ହୋଇଥାନ୍ତା । ଅଧିକାଂଶ ଦଳ ଯେଉଁମାନେ କେବଳ ଭୋଟ୍ ପାଇଁ ହିନ୍ଦୁତ୍ୱ ବିଷୟରେ କଥାବାର୍ତ୍ତା କରନ୍ତି, ସେମାନେ ଏହି ଦିଗରେ ଚିନ୍ତା କରନ୍ତି ନାହିଁ, ତେବେ ଲୋକମାନେ କିପରି ସେମାନଙ୍କଠାରୁ ଏହା ଆଶା କରିବେ ।